«ՍԻԱ» ապահովության և անվտանգության կենտրոնն անցկացնում է առաջին օգնության անվճար խտացված դասընթացներ, որոնք հնարավորություն են տալիս ձեռք բերել անհրաժեշտ գիտելիքներ և ձևավորել առաջին օգնության հմտություններ։

Դասընթացները կանոնավոր անցկացնելու համար (մասնակիցներին առաջին օգնության պարագաներ տրամադրելու և վարչական ծախսերը հոգալու համար) կենտրոնը մեր աջակցության կարիքն ունի:

Վիճակագրության համաձայն՝ առաջին 9 րոպեների ընթացքում օգնություն ստացած վիրավորների մինչև 90%-ը ողջ է մնում։ Եթե ​​ժամանակը երկարում է մինչև 18 րոպե, ապա ողջ մնացածների թիվը կրճատվում է մինչև 15%:

Մինչ օրս երկրի քաղաքացիական պաշտպանության խնդիրներից մեկն է բնակչության լայն զանգվածների շրջանում առաջին օգնության վերաբերյալ գիտելիքների և հմտությունների բացակայությունը։

Արտակարգ իրավիճակներում և դժբախտ պատահարների դեպքում առաջին օգնությունը էական դեր է խաղում մարդկային կյանքեր փրկելու գործում։ Նման իրավիճակներում օգնություն ցուցաբերելու հմտությունների և կարողությունների բացակայությունը հաճախ հանգեցնում է վիրավորների մահվան մինչև շտապօգնության ժամանումը:

Արցախյան 44-օրյա պատերազմի ընթացքում զոհվել է ավելի քան 4058 զինվոր (ըստ Զինծառայողների ապահովագրության հիմնադրամի)։ Ըստ բուժանձնակազմի՝ մահացածների ու վիրավորների մեծ մասը ստացել են բեկորային վնասվածքներ, ինչի հետևանքով շատերի մոտ եղել են նաև վերջույթների անդամահատումներ։ Մահացածների և վիրավորների թիվը շատ ավելի քիչ կլիներ, եթե ժամանակին ցուցաբերվեր համապատասխան առաջին օգնություն կամ ինքնօգնություն։

«ՍԻԱ» կենտրոնը պարբերաբար անցկացնում է առաջին օգնության անվճար դասընթացներ Երևանում։

Դասընթացի մասնակիցները ստանում են առաջին օգնության տեսական և գործնական գիտելիքներ (նաև՝ անգլերեն և ռուսերեն լեզուներով): Դասընթացի շրջանակներում ուսուցումը տեղի է ունենում 10-օրյա ծրագրով՝ շաբաթական 5 օր, օրական 2 ժամ տևողությամբ։ Յուրաքանչյուր խումբը բաղկացած է 20 հոգուց։ Մասնակից կարող են դառնալ 16-ից 56 տարեկան բոլոր ցանկացողները։

• Հոգեբանական բարդույթներ, վախեր, խուճապ
• Արյունահոսության դադարեցում, լարանների տեղադրում
• Վիրակապություն
• Կոտրվածքների և բեկորային վնասվածքների հետ վարվելակարգ 
• Կրծքավանդակի վնասվածքների հետ վարվելակարգ 
• Անգիտակից տուժած, կողային անվտանգ դիրք
• Տարհանում
• Դեղատուփի պարունակություն և դրա կիրառում 
• Արագ արձագանքման պայուսակի պարունակություն

• Արտակարգ իրավիճակներում քաղաքացիների պատրաստվածության մակարդակի բարձրացում
• Բնակչության տեղեկացվածության մակարդակի բարձրացում
• «ՍԻԱ» կենտրոնի հրահանգիչների և վարչական անձնակազմի ավելացում, ինչը հնարավորություն կտա ընդլայնել կենտրոնի գործունեության աշխարհագրությունը
• Անհատական դեղատուփերի և արագ արձագանքման պայուսակների առկայությունը մասնակիցների բնակարաններում և մեքենաներում, ինչը կօգնի հաղթահարել վախն ու խուճապը արտակարգ իրավիճակներում, նվազեցնել ոչ պատշաճ առաջին օգնության հետևանքով առաջացած հաշմանդամության և մահվան դեպքերը:

Յուրաքանչյուր խմբի ուսուցման և պատրաստման համար (20 հոգի) անհրաժեշտ է մասնակիցներին տրամադրել առաջին օգնության փաթեթներ և հոգալ վարչական ծախսերը։

Դրամահավաքի շրջանակներում ձեռք բերված բժշկական պարագաները կօգտագործվեն նաև հաջորդ հոսքերի պատրաստման համար։

«ՍԻԱ» ապահովության և անվտանգության կենտրոն» ՀԿ-ն հիմնադրվել է 2021թ։ Գործունեության ոլորտ՝ առաջին օգնություն, մարտավարական բժշկություն և առաջին օգնության այլ ճյուղեր: Կազմակերպության հիմնական նպատակներն են՝ առաջին օգնության հմտությունների ուսուցում, հրահանգիչների պատրաստում և խորացված ուսուցում՝ գործընթացում առաջատար մասնագետների ներգրավմամբ, փորձի և գիտելիքների փոխանակում։