ԶԱՐԿ կրթական ծրագիր

Ծրագրի առաքելությունն է կրթել ազգային արժեքներով առաջնորդվող սերունդ: Ծրագիրը երեխաներին սովորեցնում է արտակարգ իրավիճակներում որոշումներ կայացնել, պատասխանատվություն վերցնել կայացրած որոշումների համար, ինչպես նաև ի հայտ է բերում առաջնորդական հատկանիշներ սաների մոտ և սերմանում է թիմային աշխատելու, թիմային գործելու մշակույթ:

ԶԱՐԿ-ը մարզում է 10-17 տարեկան տղաներին և աղջիկներին։ Դասերն իրականացվում են շաբաթական երկու անգամ և ներառում են ինչպես լսարանային դասեր, այնպես էլ բացօթյա պարապմունքներ: ԶԱՐԿ-ը կազմակերպում է նաև ամենամյա մրցույթներ, տարատեսակ միջոցառումներ, ուխտագնացություններ, խմբային քննարկումներ և վարպետաց դասեր։

ԶԱՐԿ ուսումնական հատվածը ներառում է. 

• Ֆիզիկական պատրաստություն
• Ինքնապաշտպանություն
• Նախնական զինպատրաստություն
• Գոյատևում
• Լեռնագնացություն
• Առաջին օգնություն
• Արշավներ
• Քայլարշավներ
• Ազգային արժեքներին ծանոթացում 
• Հայագիտություն
• Հոգևոր դասընթացներ ՀԱԵ սպասավորների կողմից 

ԶԱՐԿ-ն այժմ գործում է Երևանում և Հայաստանի մի շարք մարզերում: Մեր վերջնական նպատակն է ծրագիրը հասանելի դարձնել Հայաստանի յուրաքանչյուր երեխայի համար: (ԶԱՐԿ-ը նաև մարզում է մի քանի մանկատան սաների):

Տարեցտարի ԶԱՐԿ-ը բացում է նոր մասնաճյուղեր՝ հաշվի առնելով երեխաների մոտ առկա հետաքրքրությունն ու սերը ծրագրի նկատմամբ: 

Նորաբաց խմբերի համար անհրաժեշտ սարքավորումները ձեռք բերելու, ինչպես նաև ընթացիկ ծախսերն ապահովելու համար ԶԱՐԿ-ը մեկնարկել է կրթաթոշակային համակարգ: Սա թույլ է տալիս հովանավորներին վճարել հստակ թվով երեխաների տարեկան կրթության համար՝ ապահովելով նրանց մասնակցությունը ԶԱՐԿ-ին:

Մեկ երեխայի մասնակցության տարեկան արժեքը կազմում է 250.000 դրամ։ Ամբողջական ծրագիրն ավարտելը տևում է երկու տարի: Համախոհներից և հովանավորներից մենք հայցում ենք ֆինանսական աջակցություն՝ կրթաթոշակի տեսքով՝ նշված ծախսերը հոգալու համար: